Hebrews 1
Anutu nu tuc kô i kɨyang mɨ lam nêl vô il
1Ilage Anutu nêl i kɨyang vô plopete tɨyi buc tɨbeac ên nêb he i loc nêl vô il buge ên he i ngô. Om wê Anutu nêl i kɨyang vô plopete ilage, od o tɨmu vô môp tibed lêm. Nge, tɨmu vô môp toto dɨ nêl i kɨyang vô he. 2Lêc buc tɨmuên vɨwen gwêbaga Anutu vông môp paha bêga nêbê vông nu tuc lam ên nêb i lam nêl Anutu kɨyang i yêp seac vô il. Ilage Anutu nêl om nu tuc tung lag yuu kɨbun, dɨ Anutu vɨnoo i pyap ên nêb ob nêl nu tuc lê lec susu lag yuu kɨbun vɨhati. 3Xêseac wê Yesu vông ge tɨyi xocbê xêseac wê Anutu vông ge, dɨ Yesu hɨxôn Anutu, yuu xôn tɨyima. Dɨ kɨyang wê Yesu vông ge xêkɨzêc om ngɨdu susu lag yuu kɨbun vɨhati yang ge xôn dɨ vông he dô xêkɨzêc. Yesu lam yib ên nêb ob vô xomxo vêl ên he nên nipaên. Pyap dêc lax mɨ la dô vô Anutu vɨgê hɨyôv gê kɨsii ganê.Anutu nu tuc ngɨnoo angela vêl
4Anutu vông lê levac vô nu tuc om nu tuc ngɨnoo angela vɨhati vêl, ên lê levac wê Anutu nu tuc vông ge luu angela lê vêl. 5Ilage Anutu nêl vô nu tuc ên nêbê,- “Ông ge a nug, dɨ gwêbaga a vông ông lêm vô levac.”
- “A tu ông mam, dɨ ông tu a nug.”
- “Angela wê a vông ge, he vɨhati i yev vɨxa kɨtu vô a nug tuc.”
- “Angela wê a vông ge tu a nuge yuac, om a obêc nêl ge od he obêc tɨyi xocbê lea, me he obêc tɨyi xocbê ngwax mahelac dɨ ob la vông yuac tɨyi xocbê a nêl ge.”
- “O Anutu, ông tu xomxo nên levac wê ông obêc dô luta lêc luta, dɨ ông viac nume** vɨhati ya kɨyang yuu môp bôbac.
- “Apumtau, vô buc taxlee ge ôcông va tu kɨbun kehe, dɨ ôcông va vɨgêm tung lag hɨxôn.
- “Ông lam dô vô a vɨgêg hɨyôv, dɨ i loc tyip vô buc wê a obêc vông xomxo wê vông vevac vô ông ge he i lam dô vac ông kwa ngɨbi.”
Copyright information for
PTP